FESTIVAL COLEGA: TOHORROR FANTASTIC FILM FEST
Xoves, 25 de setembro ás 20:00
CINES TAMBERLICK
Este ano temos a honra de contar co TOHorror Fantastic Film Fest (Italia) como festival colega.
O TOHorror Fantastic Film Fest é un dos festivais máis importantes de Italia dedicados ao cinema de xénero. Nacido en 1999 co bautismo dun padriño excepcional, Dario Argento, ten a súa sede na cidade de Turín, Italia. Orgullosamente independente dende a súa fundación, foi renovándose ao longo dos anos, pasando de ser un evento vinculado unicamente ao cinema de terror underground italiano a converterse nun festival internacional heteroxéneo, que cada ano presenta decenas de obras dos recunchos máis dispares do globo, incluíndo longametraxes e curtametraxes tanto de cineastas novatos como consagrados, dedicado a todo o relacionado co terror, a ciencia ficción, a fantasía, o thriller, a comedia negra, o grotesco, o raro, o surrealista…
Un dos obxectivos de TOHorror é contribuír a difundir voces novas talentosas e independentes na escena do cinema de xénero. Xunto a filmes de cineastas consagrados, o programa do festival presenta anualmente moitas obras de directores novatos ou de segunda película. Nos últimos anos tiveron a honra e o pracer de presentar en Italia xoias alternativas e debuts formidables como “Red Rooms” de Pascal Plante, “Saint Maud” de Rose Glass, “The Sadness” de Rob Jabbaz, “Skinamarink” de Kyle Edward Ball, “Eight Eyes” de Austin Jennings, “Abruptio” de Evan Marlowe, “Amulet” de Romola Garai, “One Cut of the Dead” de Shinichiro Ueda, “We’re All Going to the World’s Fair” de Jane Schoenbrun, “Voidcaller” de Nils Alatalo, “Mad Heidi” de Johannes Hartmann e Sandro Klopfstein e moitos outros.
Ademais das longametraxes, as seccións de Curtametraxes e Curtametraxes de Animación son definitivamente unha das pedras angulares do festival: máis de 50 curtas son seleccionadas cada ano, sacando á luz algúns dos cineastas emerxentes máis prometedores no panorama do cinema fantástico e de terror contemporáneo.
Sendo un evento transversal, TOHorror comeza cos filmes e logo explora todos os medios modernos posibles, co obxectivo de analizar a sociedade actual a través da lente deformante da cultura fantástica.
Así, a través de proxeccións, encontros con convidados (nos últimos anos: Robert Morgan, Dave McKean, Richard Stanley, Jean Rollin, Dario Argento, Ruggero Deodato, Hélène Cattet & Bruno Forzani, Miguel Angel Martin, Klaus Maeck, André Bonzel…), música en directo, exposicións de arte, presentacións de cómics, charlas, mesas redondas e festas salvaxes, conseguimos experimentar a realidade a través da imaxinación máis desatada.
A 24ª edición de TOHorror celebrouse en outubro de 2024, presentando estreas italianas de filmes tan grandes como “In A Violent Nature” de Chris Nash, “Oddity” de Damian McCarthy, “Sayara” de Can Evrenol, “Else” de Thibault Emin, “Animale” de Emma Benestan, “Steppenwolf” de Adilkhan Yerzhanov, “Krazy House” de Steffen Haars & Flip Van der Kuil, “Spermageddon” de Tommy Wirkola & Rasmus Sivertsen, “So Unreal” de Amanda Kramer e moitos, moitos outros; así como unha ampla programación de curtametraxes de animación e acción real incríbeis.
SELECCIÓN TOHORROR
Us-her
David Salgado Marcote
Estrea en Galicia
US-HER é unha adaptación libre do conto de Edgar Allan Poe, A caída da Casa Usher. Alba e Pedro viven nunha casa en ruínas. Tras a morte da súa nai reciben a visita dos seus catro irmáns, Celia, Laura, Esther e Juan, quen pretende facerse co seu parte da herdanza, vendendo a casa e repartíndose o diñeiro. Pero a casa ten outros plans…
- 19º River Film Festival (Italia, 2025)
- 1º Benissa en Corto (España, 2025)
- 13º Festival de cine de Terror en el Castillo (España, 2025)
- Premio “Galician Freak” (GFFF #9 2025)
O neno do hórreo
Diego López Curros
Catro estudantes de audiovisuais na busca dunha reportaxe truculenta coa que petalo nas redes descubrirán a historia dunha nena encerrada polos seus pais nun hórreo da recóndita aldea de Furallela. Pronto aprenderán que a verdade é máis complexa do que pensaban, e atoparanse enredados nunha violenta trama de horror satánico, humor chungo e confusión sexual.
Desaliento
Pinky Alonso
Despois de facer o amor, unha parella comeza unha discusión na que afloran segredos inconfesables que os levarán a un final que nunca imaxinarían.
Affairs of the Art
Joanna Quinn
Beryl mostra as obsesións excéntricas pero entrañables dunha familia, desde debuxar ata roscas de parafusos e taxidermia de mascotas.
- Nomeada a Mellor Curta de Animación, Premios Oscars (EUA, 2022)
- Nomeada a Mellor Curta de Animación Británica, Premios BAFTA (Reino Unido, 2022)
- Premio do Xurado, Festival Internacional de cinema de animación de Annecy (Francia, 2021)
- Mellor Animación (Competición Internacional), Clermont-Ferrand International Short Film Festival, 2021)
Filante
Marion Jamault
Cada noite, Paulette observa a mesma estrela fugaz no ceo. Pide o seu desexo máis profundo: atopar á súa rata mascota, misteriosamente desaparecida. Pasan os días, pero o animal non regresa. Paulette quere entender que lle pasa á súa estrela.
- Premio do Público, 10º Festival Cinéma Jeune Public (Suíza, 2024)
- Premio de Escuelas, 39º Festival européen du film court de Brest (Francia, 2024)
- Premio do Público, 16º Paris International Animation Film Festival (Francia, 2024)
- 27º MECAL – Festival Internacional de Cortometrajes y Animación de Barcelona (España, 2025)
Balance
Raymond Limantara Sutisna
Dous pintores dispútanse o espazo que teñen para pintar ao seu estilo.
Nimic
Yorgos Lanthimos
Estrea en Galicia
Un violonchelista profesional ten un encontro cunha descoñecida no metro que terá ramificacións inesperadas e de gran alcance na súa vida.
- Premier – Locarno FF 2019
- Selección oficial – Melbourne FF 2020
Back to the Tic
Alumnos de Realización en Televisión da Escola Fundación TIC
Martiño McFly viaxa no tempo ata o ano 2011 para buscar ao seu pai na Escola de Imaxe e Son de Lugo (TIC) e transmitirlle unha mensaxe antes de que se titule como técnico de realización audiovisual. Martiño McFly verase envolto en escenas clásicas do cine coas nenas d'O Resplandor, Morpheo de The Matrix, Jose Luis Garci ou McGyver, que intentarán axudarlle na súa viaxe de regreso á TIC.
Third Kind
Yorgos Zois
Estrea en Galicia
A terra foi abandonada hai tempo e a raza humana atopou refuxio no espazo exterior. Tres novos arqueólogos volven á terra para investigar de onde provén un misterioso sinal de cinco tons…
La última partida
The Last Game
Luis Belda
Estrea en Galicia
Álvaro e os seus amigos dispóñense a xogar unha das súas habituais partidas de rol cando un inquietante descubrimento fará que o xogo cambie para sempre.