O Galician Freaky Film Festival (GFFF) non é só unha mostra de cinema fantástico e de terror. É tamén unha plataforma profesional que impulsa o sector audiovisual galego e establece pontes entre creadores, produtoras, institucións e profesionais do eido cultural.
Un espazo de encontro profesional
A nosa sección GFFF Industry convértese cada ano nun punto de confluencia fundamental para a industria audiovisual galega. Desenvolve un amplo programa de actividades especializadas que van desde a presentación de proxectos en desenvolvemento ata mesas de debate sobre financiamento e colaboracións estratéxicas entre festivais.
Actividades especializadas
Work in progress: “A que andas, freak?”
Unha das nosas actividades estrela é o espazo dedicado aos proxectos galegos en fase de desenvolvemento. Esta iniciativa permite aos creadores presentar os seus proxectos ante profesionais do sector, crear sinerxias entre produtoras, directores e outros axentes da industria, e achegar ao público especializado o que está por vir no audiovisual galego.
Mesas redondas e debates profesionais
Organizamos encontros especializados que abordan as temáticas máis relevantes para o sector:
- Procesos creativos: Charlas cos principais referentes do sector, como Alberto Vázquez, para analizar en profundidade os procesos de creación, produción e distribución.
- Financiamento público: Sesións formativas sobre como acceder ás principais liñas de axuda dispoñibles (AGADIC, ICAA, Creative Europe MEDIA) e como estruturar proxectos audiovisuais viables.
Rede de festivais: “Irmandades do Norte”
En colaboración coa Vigo Film Office, impulsamos encontros entre festivais de xénero de diferentes rexións (Euskadi, Navarra, Catalunya e Galicia). Estas sesións permiten compartir experiencias, analizar a saúde do cinema de xénero no Estado español e establecer colaboracións entre equipos de programación.
Respaldo institucional
As nosas actividades de industria contan co apoio de institucións especializadas como a Vigo Film Office, que ofrece facilidades ás produtoras que elixen Galicia como escenario de rodaxe, así como recursos para o desenvolvemento local do sector audiovisual.
Compromiso co talento local
GFFF Industry ten como obxectivo prioritario:
- Visibilizar o talento audiovisual galego en todas as súas fases de desenvolvemento
- Facilitar o acceso a recursos de financiamento e formación especializada
- Crear espazos de networking entre profesionais do sector
- Establecer pontes de colaboración con outros festivais e entidades culturais
- Impulsar a produción audiovisual galega no marco do cinema fantástico e de xénero
A través desta sección profesional, o GFFF afiánzase non só como un festival de referencia no ámbito do cinema fantástico, senón como unha plataforma activa para o crecemento e a profesionalización do sector audiovisual galego.
Axenda GFFF Industry 2025
Xoves, 25 de setembro
11:00 – A que andas, freak?
Sala Apo’strophe.Arte – Plaza Elíptica
Work in progress con presentación dos seguintes proxectos galegos:
- Teatro de sombras de David Salgado Marcote (Dama Negra Films)
- Inesiña de Gutier Rolán (inspirada en Emilia Pardo Bazán)
- Nargual Review – La Película de Nico “Nargual” González
- Whisperwoods de Carlos Almón
- Cheo de ruído e de furia de Fernando Tato (Kraken Media)
- A xusta ira de Fernando Tato (Kraken Media)
13:00 – Mesa: Financiamento Público
Sala Apo’strophe.Arte – Plaza Elíptica
Con Agustina Pereira (SiSubvenciones). Análise das principais liñas de axuda dispoñibles (AGADIC, ICAA, Creative Europe MEDIA) e claves para converter ideas creativas en proxectos audiovisuais viables e financiables.
Venres, 26 de setembro
11:00 – Mesa Vigo Film Office: II Encontro entre Festivais – Irmandades do Norte
Sala Apo’strophe.Arte – Plaza Elíptica
Encontro entre representantes de festivais de xénero de Euskadi, Navarra, Catalunya e Galicia:
- Josemi Beltrán (Semana de Cine Fantástico y de Terror de San Sebastián)
- Roger Sàbat e Agustí Lloberas (Terror Molins – Catalunya)
- Jacint Espuny (FangoFest – Catalunya)
- Miguel Suárez del Cerro (Festival Internacional de Cine Fantástico y de Terror de Navarra)
- Anabel Soto (Lóstrego – Festival de Cinema Fantástico da Coruña)
- Luis M. Rosales (Curtas – Festival do Imaxinario de Vilagarcía)
Sábado, 27 de setembro
11:00 – Decorado, proceso creativo da longametraxe con Alberto Vázquez
Sala Apo’strophe.Arte – Plaza Elíptica
O aclamado director de animación galego presenta o proceso creativo da súa nova película “Decorado”, que se estreará en cines o 24 de outubro. Análise dos procesos complexos da animación, arte e produción dunha longametraxe de animación.